أكتر حاجة بتأخر مشاريع المواقع مش البرمجة، هي المحتوى اللي متأخر والقرارات اللي مش واضحة. لما تعرف المراحل من الأول، بتجهز اللي عليك في وقته، وتعرف تتوقع إيه في كل مرحلة، وتقدر تحاسب المطوّر على حاجة محددة. في المقال ده همشي معاك على نفس الـ Process اللي بشتغل بيه مع عملائي، من أول رسالة لحد ما الموقع يشتغل ويجيب نتيجة.
01قبل ما تبدأ: جهّز الأساسيات
قبل أول مكالمة، جهّز الحاجات دي وهتوفر أسبوع على الأقل:
- وصف نشاطك في سطرين: بتبيع إيه ولمين
- 3 مواقع عاجباك، ولو تقدر تقول عاجباك ليه
- أهم 5 أسئلة العملاء بيسألوها قبل ما يشتروا
- اللوجو والألوان لو موجودين
- مين اللي هيوافق على الشغل عندك، عشان القرارات متتعطلش
ولو لسه بتدوّر على مين ينفذ، اقرأ الأول إزاي تختار مطوّر من غير ما تندم.
021. البريف والتحليل
هنا بنتكلم عن نشاطك، عميلك، منافسينك، والهدف من الموقع بالأرقام لو أمكن: عايز طلبات؟ حجوزات؟ رسائل واتساب؟
في المرحلة دي بحدد:
- نوع المشروع المناسب: موقع تعريفي، متجر، ولا صفحة هبوط، والفرق شرحته في موقع تعريفي ولا متجر ولا صفحة هبوط
- المنصة المناسبة
- الصفحات المطلوبة
- التكاملات: دفع، شحن، واتساب، حجز، CRM
- جدول زمني بمراحل واضحة
كل ما البريف أوضح، كل ما النتيجة أدق والتعديلات أقل. بريف ضعيف معناه إن التخمين هيبقى كتير.
032. المحتوى والهيكل
هنا بنحدد خريطة الموقع: الصفحات، وترتيب الأقسام في كل صفحة، والرسالة الأساسية. وبعدها المحتوى نفسه: نصوص، صور، منتجات، أسعار، شهادات.
نصايح المرحلة دي:
- المحتوى هو أكتر حاجة بتأخر المشاريع، فابدأ فيه من أول يوم
- الصور الحقيقية لشغلك وفريقك أقوى بكتير من صور الإنترنت
- اكتب للعميل مش لنفسك: إيه المشكلة اللي بتحلها، ومش بس إنت مين
- لو متجر، جهّز المنتجات في شيت منظم: الاسم، السعر، المقاسات، الوصف، الصور
أقدر أساعد في كتابة المحتوى وصياغته بشكل يبيع، وده بيفرق كتير في النتيجة. شوف مثلًا إزاي تكتب وصف منتج بيبيع.
043. التصميم
بنصمم الصفحات الأساسية الأول: الرئيسية، وصفحة خدمة أو منتج، وصفحة التواصل أو الدفع. وبنصمم للموبايل من الأول، لأن أغلب الزوار هييجوا منه. شوف تحسين الموقع للموبايل.
المراجعة بتحصل هنا قبل البرمجة، عشان التعديل في التصميم أرخص وأسرع بكتير من التعديل بعد ما الصفحة تتبرمج. وأنا بصمم بعقلية CRO: كل قسم ليه دور في إنه يقرّب الزائر من الطلب، مش مجرد شكل حلو. التفاصيل في تصميم UI/UX وتأثيره على المبيعات.
نصيحة: اجمع ملاحظاتك في رسالة واحدة منظمة بدل رسايل متفرقة، ده بيخلّي التعديلات أدق وأسرع.
054. التطوير والتكاملات
هنا الموقع بيتبني فعليًا:
- برمجة الصفحات بنفس التصميم المتفق عليه
- ربط الدفع والشحن لو متجر
- الفورمز وزرار واتساب برسالة جاهزة
- إعداد التتبع: GA4 وTag Manager، وMeta Pixel وConversions API لو هتعلن
- أساسيات السيو التقني: العناوين، الوصف، خريطة الموقع، السرعة
- تحسين السرعة من البداية مش بعد الإطلاق
في المرحلة دي بشاركك رابط تجريبي تتابع منه التقدم، وتشوف الموقع شغال قبل ما يتنشر.
065. الاختبار والإطلاق
قبل الإطلاق في checklist لازم تعدي كلها:
- تجربة على موبايلات ومتصفحات مختلفة
- طلب تجريبي كامل لو متجر، من السلة لحد رسالة التأكيد
- إرسال كل فورم والتأكد إن الرسالة وصلت
- اختبار السرعة على PageSpeed
- التأكد إن التتبع بيسجّل الأحداث صح
- الروابط القديمة لو فيه موقع قديم بتتحوّل بـ 301 عشان متخسرش ترتيبك
وبعدين الإطلاق، وتسجيل الموقع في Google Search Console ورفع خريطة الموقع.
07بعد الإطلاق: الشغل الحقيقي بيبدأ
الموقع مش مشروع بيخلص يوم الإطلاق. أول شهر بعد الإطلاق هو أهم شهر:
- متابعة أي مشكلة تقنية في الشغل المسلّم
- قراءة بيانات التتبع: الناس بتقف فين وبتخرج منين
- تحسينات صغيرة على الأماكن اللي فيها تسريب، وده أساس CRO
- محتوى منتظم ومقالات لو عايز ظهور في جوجل
والعملاء اللي بيكمّلوا تطوير بعد الإطلاق هما اللي بيشوفوا النتيجة الأكبر.
08إزاي تخلي المشروع يمشي أسرع
من خبرتي، المشاريع اللي بتخلص في ميعادها بيبقى فيها:
- شخص واحد مسؤول عن القرارات من ناحية العميل
- محتوى جاهز بدري
- ملاحظات مجمعة ومكتوبة بوضوح
- اتفاق من الأول على عدد المراجعات وشكل التسليم
ولو عايز تعرف تكلفة مشروعك والوقت المتوقع، العوامل كلها في تكلفة إنشاء متجر إلكتروني، أو ابعتلي تفاصيل مشروعك وأرد عليك بخطة واضحة.
أسئلة شائعة
المشروع بياخد قد إيه؟
حسب الحجم والمحتوى والتكاملات. صفحة الهبوط أسرع حاجة، والمتجر بياخد وقت أكتر. الجدول الزمني بيتحدد بمراحل واضحة في البداية.
هقدر أعدل في التصميم؟
أيوه، فيه مراجعات في مرحلة التصميم قبل البرمجة، وده بيوفر تعديلات مكلفة بعدين.
لازم أجهز المحتوى بنفسي؟
الأفضل تجهز المعلومات والصور، وأقدر أساعد في كتابة وصياغة المحتوى بشكل يبيع.
الموقع هيبقى ملكي؟
أيوه. الموقع والدومين والحسابات بتبقى باسمك، وده لازم يكون واضح في أي اتفاق مع أي مطوّر.
بعد الإطلاق لو حصلت مشكلة؟
أي مشكلة تقنية في الشغل المسلّم بتتحل، وفيه دعم ومتابعة بعد الإطلاق.
موقع تعريفي أو صفحة هبوط برسالة واضحة، سريعة، ومظبوطة للسيو والتتبع.



التعليقات